കേരളത്തിലെ ആദ്യ സമർപ്പിത കണ്ടെയ്നർ ഫ്രെയ്റ്റ് സ്റ്റേഷൻ ഇന്ന് നിർമാണ ഉത്ഘാടനം നിർവഹിക്കുന്നു

തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തെ ചരക്ക് നീക്കങ്ങൾക്ക് പിന്തുണ നൽകുന്നതിനായി കേരളത്തിലെ ആദ്യ സമർപ്പിത കണ്ടെയ്നർ ഫ്രെയ്റ്റ് സ്റ്റേഷൻ (CFS) ബാലരാമപുരത്ത് ഒരുങ്ങുന്നു. കേരള സ്റ്റേറ്റ് ഇൻഡസ്ട്രിയൽ എന്റർപ്രൈസസ് ലിമിറ്റഡ് (KSIE) നടപ്പാക്കുന്ന പദ്ധതിക്ക് ബുധനാഴ്ച തുടക്കമാകും.

ബാലരാമപുരത്തെ ട്രാവൻകൂർ സ്പിന്നിങ് മിൽസ് (TSM) വളപ്പിലെ ഏകദേശം അഞ്ച് ഏക്കർ സ്ഥലത്താണ് CFS സ്ഥാപിക്കുന്നത്. 25 കോടി രൂപയാണ് പദ്ധതിയുടെ ആകെ നിക്ഷേപം. നാല് ഘട്ടങ്ങളിലായി നടപ്പാക്കുന്ന പദ്ധതി 2027 ഫെബ്രുവരിയോടെ പൂർണതോതിൽ പ്രവർത്തനമാരംഭിക്കാനാണ് ലക്ഷ്യമിടുന്നത്.

ആദ്യഘട്ടത്തിൽ പ്രതിമാസം 2,000 മുതൽ 2,500 TEU വരെ കണ്ടെയ്നറുകൾ കൈകാര്യം ചെയ്യാനാണ് ലക്ഷ്യമിടുന്നത്. കസ്റ്റംസ് പരിശോധന, ചരക്ക് ക്ലിയറൻസ്, താൽക്കാലിക സംഭരണം, കണ്ടെയ്നർ സ്റ്റഫിങ്, ഡീസ്റ്റഫിങ് തുടങ്ങിയ പ്രവർത്തനങ്ങൾ തുറമുഖത്തിന് പുറത്തുവച്ച് നടത്താൻ CFS വഴി സാധിക്കും.

വിഴിഞ്ഞം തുറമുഖത്തിൽ നിന്ന് ഏകദേശം 15–20 മിനിറ്റ് യാത്രാദൂരത്തിലാണ് ബാലരാമപുരത്തെ CFS സ്ഥിതി ചെയ്യുന്നത്. റീഫർ കണ്ടെയ്നറുകൾക്കായി പ്രത്യേക പ്ലഗ്-ഇൻ സൗകര്യവും ഇവിടെ ഒരുക്കും. താപനില നിയന്ത്രണം ആവശ്യമായ ഭക്ഷ്യവസ്തുക്കൾ ഉൾപ്പെടെയുള്ള ചരക്കുകളുടെ കൈകാര്യം കൂടുതൽ കാര്യക്ഷമമാക്കാൻ ഇത് സഹായിക്കും.

വിഴിഞ്ഞം തുറമുഖത്തിന്റെ EXIM പ്രവർത്തനങ്ങൾ വിപുലപ്പെടുന്ന സാഹചര്യത്തിൽ ബാലരാമപുരത്തെ CFS പ്രധാന ലോജിസ്റ്റിക് സൗകര്യമായി മാറുമെന്നാണ് പ്രതീക്ഷിക്കുന്നത്. തുറമുഖത്തെ കണ്ടെയ്നർ നീക്കം സുഗമമാക്കുന്നതിനും ചരക്ക് സംഭരണം, കസ്റ്റംസ് ക്ലിയറൻസ് തുടങ്ങിയ പ്രവർത്തനങ്ങൾ കാര്യക്ഷമമാക്കുന്നതിനും പദ്ധതി സഹായകരമാകും.